श्री हरिदास शास्त्री महाराज जी हे एक नामनेचे गौडीय वैष्णव विद्वान आनी साधक, जांचो वृंदावनांतल्या विद्वान समाजान मान केलो. संस्कृताचे पंडीत आशिल्ल्या तांणी सुमार ऐशीं पुस्तकां बरयलीं, तातूंतलीं जायतीं गौडीय ग्रंथांचे अणकार आनी तांचीं स्वताचीं भाश्यां.
विसाव्या शेंकड्यांतले बहुदा सगळ्यांत चड बरोवपी आनी सगळ्यांत चड शिकिल्ले गौडीय वैष्णव “भितरले” विद्वान.
जोनाथन एडलमन, युनिवर्सिटी ऑफ फ्लोरिडा
सुरवेचें जिवीत आनी दीक्षा
तांचो जल्म 1918 वर्सा अस्तंत बंगालांतल्या रोपा हांगा श्रीमती सुशीला देवी आनी श्री अभयचरण चट्टोपाध्याय हांचे पोटांत जालो, आनी तांचें नांव फणीन्द्र नाथ दवरलें. 1933 वर्सा, पंदरा वर्सांचे आसतना, ते मथुरेक गेले आनी पंडित बाबा श्री राम कृष्णदास हांच्या छत्राखाला आयले.
पंडित बाबांनी आपले एकमेव वेष शिश्य, श्री विनोद विहारी गोस्वामी, हांकां भुरग्याचे शिक्षक म्हूण वेंचले. तांचे कडल्यान फणीन्द्राक मंत्र-दीक्षा आनी हरिदास हें नांव मेळ्ळें, आनी एका वर्सा उपरांत बाबाजी-वेष. ते आपल्या गुरूं वांगडा भक्तीभावान सेवा करत रावले आनी पंडित अमोलकराम शास्त्री आनी धनंजय दास सयत वृंदावनांतल्या हेर व्हड विद्वानां कडेनूय तांणी अभ्यास केलो.
आपल्या गुरूंच्या आज्ञे प्रमाण तांणी उपरांत भारतीय तत्वगिन्यानाचो अभ्यास करपाक बनारसांत बारा वर्सां सारलीं. वामाचरण शास्त्री आनी हरेराम शास्त्री सारक्या शिक्षकां सकयल, भारतीय तत्वगिन्यान आनी धर्मशास्त्राच्या सगळ्या स सांप्रदायांक धरून, तांणी णव पदवी आनी तीन पदव्युत्तर पदव्यो मेळयल्यो.
वेदान्त-दर्शनम्
श्रीमद्भागवत स्वताक त्याच लेखकाच्या, व्यासाच्या, वेदान्त-सूत्रांचेर भाश्य म्हूण सादर करता. महाराज जीं मेरेन, कोणेंच ह्या दोन ग्रंथां मदलो संबंद श्लोकान श्लोक दाखयिल्लो ना. तांच्या वेदान्त-दर्शनम् भागवत-भाष्योपेतम् ग्रंथान नेमकें हेंच केलें, आनी ताचो बनारसच्या नागरी प्रचारिणी सभेन मान केलो.
श्री हरिदास निवास आनी छापखानो
1965 वर्सा तांणी वृंदावनांतल्या पुराना कालीदह हांगा श्री हरिदास निवासाची स्थापना केली, श्री गदाधर पंडिता वांगडा श्री चैतन्य महाप्रभूचें वृंदावनांतलें पयलें देवूळ घेवन.
गदाधर परिवाराचे आशिल्ल्यान, गौडीय आचार्यांचे, खास करून श्री जीव गोस्वामींचे, ग्रंथ सगळ्यांक मेळचे म्हूण तांणी गदाधर-गौरहरि प्रेसाची स्थापना केली. षट् सन्दर्भांचो भाश्या सयत हिंदींत अणकार करपी ते पयले. तांणी बांदिल्लें श्री गौर-गदाधर ग्रंथागारम् ग्रंथालय आयज वृंदावनांतल्या सगळ्यांत व्हड ग्रंथालयां मदलें एक.
गायांचेर तांचो मोग
दोन गायां सावन दोनशें पन्नास मेरेन
1981 वर्सा महाराज जींनी आपल्या आश्रमांत फकत दोन गायो आनी एक बैल घेवन गोठो सुरू केलो. ते दरेकल्याची स्वता काळजी घेताले. तांणी हें संवसार सोडलें तेन्ना ताणें 250 गायांक आनी बैलांक आलाशिरो दिलो, आनी तांच्या शिश्यां सकयल तो वाडत रावला. ही सेवा सदांकाळ चालू दवरपा खातीर तांणी विस्वस्त मंडळा वरवीं चलपी श्री हरिदास शास्त्री गो सेवा संस्थानाची स्थापना केली.
वेंचीक पुस्तकां
- वेदान्त-दर्शनम् भागवत-भाष्योपेतम्
- श्री-साधनामृत-चन्द्रिका
- श्री-गौर-गोविन्दार्चन-पद्धति
- श्री-राधा-कृष्णार्चन-दीपिका
- श्री-गोविन्द-लीलामृतम् (3 खंड)
- ऐश्वर्य-कादम्बिनी
- श्री-सङ्कल्प-कल्प-द्रुम
- चतुःश्लोकी-भाष्यम् आनी श्री-कृष्ण-भजनामृत
- प्रेम-सम्पुट
- श्री-भगवद्-भक्ति-सार-समुच्चय
- ब्रज-रीति-चिन्तामणि
- धर्म-सङ्ग्रह आनी श्री-चैतन्य-सूक्ति-सुधाकर